SORT IT դասընթացները Հայաստանում

Ցածր և միջին եկամուտ ունեցող երկրներում, գործառական հետազոտությունները չափազանց կարևոր են և անհրաժեշտ։ Դրա հետ մեկտեղ, հետազոտություններ անցկացնելու հնարավորությունները և հզորությունները սահմանափակ են։ ԱՀԿ-ի կողմից համակարգված գործառական հետազոտությունների և վերապատրաստման նախաձեռնության (Structured Operational Research and Training Initiative – SORT IT) դասընթացները մասնակիցներին ուսուցանում են, թե ինչպես իրականացնել գործառական հետազոտություններ և ինչպես հրապարակել ստացված արդյունքները միջազգային ամսագրերում։

2009 – 2014 թթ. ընթացքում անցկացվել են քսան դասընթացներ, որոնց մասնակցել են 236 մասնակից 59 երկրներից, հիմնականում Ասիա և Աֆրիկա։ Մասնակիցներից շատերը ընդգրկված են եղել կառավարության առողջապահական և հասարակական կազմակերպությունների ծրագրերում։ Ընդհանուր առմամբ, 90% մասնակիցներ հաջողությամբ ավարտել են դասընթացի փուլերը։ Գիտական ամսագրերին տպագրության են ներկայացվել և տպագրվել են 197 աշխատանքներ։

2017թ–ին Հայաստանում SORT IT դասընթացներ իրականացնելու նախաձեռնությամբ հանդես եկավ դոկ. Գևորգ Յաղջյանը, ով ընդառաջելով ԱՀԿ-ի ներկայացուցիչներին կազմակերպեց առաջին հանդիպում/քննարկումը ՀՀ ԱՆ գիտաբժշկական գրադարանում։ Հանդիպմանը մասնակցում էին նաև SORT IT Հայաստանի համակարգողը և ՀՕՖ-ի ներկայացուցիչը՝ որպես ծրագրի աջակից։

2017թ–ին ՀՀ ԱՆ Հանրապետական գիտաբժշկական գրադարանը ՀՀ ԱՆ տուբերկուլոզի դեմ պայքարի ազգային կենտրոնի և «Տուբերկուլոզի հետազոտությունների և կանխարգելման կենտրոն» ՀԿ-ի հետ համատեղ ձեռնարկեց առաջին հայկական SORT IT դասընթացների իրականացումը:

2017թ սեպտեմբեր ամսին տեղի ունեցավ մասնակիցների առաջին հավաքը։ Հանդիպման ժամանակ մանրամասն ներկայացվեց ծրագրի նպատակը, խնդիրները, տևողությունը և իհարկե ակնկալվող արդյունքները: Այդ հանդիպմանը հաջորդեցին դասընթացի հերթական սեսիաները, որոնց ընթացքում մասնակիցները հնարավորություն էին ստանում լրացնել և զարգացնել իրենց հետազոտությունները։ Ներկայումս ծրագրի մասնակիցները 12–ն են, որոնք ներկայացնում են տարբեր բժշկական կազմակերպություններ: Այսուհետ SORT IT դասընթացների մասնակիցների կատարած հետազոտությունների վերաբերյալ տեղեկատվությունը պարբերաբար կներկայացվի ՀԳԲԳ FB-յան էջում:

Հարցեր, պատասխաններ, մեկնաբանություններ